Siglir tar il cuntegn

Header

audio
Nagina skateline quest'enviern
Or da Actualitad dals 27.10.2021.
abspielen. Laufzeit 2 minutas 56 Sekunden.
cuntegn

Dispita pervi da concept Skateline resta serrada quest enviern

La via da glatsch tranter Alvagni e Surava resta serrada er quest enviern. Cuntrari a l'onn passà però betg pervi da la pandemia mabain pervi d'ina dispita tranter la vischnanca d'Alvra e l'uniun che maina la purschida.

Raschun per la dispita è il concept da manaschi per la «Skateline». Suenter che vischinas e vischins eran sa lamentads che la via saja daventada in disturbi, ha l'uniun inoltrà il zercladur avant in onn in concept a la vischnanca. La resposta da la vischnanca è dentant pir vegnida quest october. Pia 15 mais pli tard.

En quella resposta pretenda la vischnanca uss dentant ch'i vegnia fatg tschertas midadas per questa stagiun. Latiers vai sur tut per ils bajetgs che vegnan montads temporar. Quels na correspundian per part betg a las ordinaziuns per la protecziun da las auas. Daniel Albertin conferma envers La Quotidiana che la reposta haja duvrà memia lung, declera però ch’il concept inoltrà aveva problems che la vischnanca possia betg schliar.

Prescripziuns sco la zona da protecziun d’aua n'èn betg nossa responsabladad, mabain quella dal chantun. Nua che nus essan responsabels, essan nus era pronts da chattar soluziuns.
Autur: Daniel Albertin President communal d’Alvra

L’unic giavisch che la vischnanca aveva era da reorganisar il traffic. Per chattar soluziuns èn ils d’Alvra tenor Daniel Albertin pronts, dentant duain tuttas e tuts ch’èn involvids esser cuntents.

En uschè curt temp n’avain nus betg pli pudì chattar ina soluziun adattada per questa stagiun. La Skateline resta serrada.
Autur: Giorgio Bossi President ed iniziant da la Skateline Alvra

Per far las midadas hajan ins uss dentant memia pauc temp, crititgescha l'uniun. A la radunanza generala da glindesdi, ha il president da la «Skateline» Giorgio Bossi perquai era fatg reproschas a la vischnanca, ch'ins haja spetgà memia ditg cun la resposta.

RTR novitads 06:00

Artitgels legids il pli savens

Scrollar a sanestra Scrollar a dretga