Siglir tar il cuntegn

Header

audio
Surses survegn la pli gronda resgia dal Grischun
Or da Actualitad dals 31.03.2021.
laschar ir. Durada: 3 minutas 39 Secundas.
cuntegn

Economia forestala Surses survegn la pli gronda resgia dal Grischun

Nizzegiar las resursas indigenas. Quai è la finamira da l'interprendider da lain Enrico Uffer da Savognin. El planisescha a Tinizong la pli gronda resgia dal chantun. Quella duess elavurar 30'000 meters cubic laina radunda. Per realisar qual quantum dovri laina da l'entira regiun Alvra.

Serrar la davosa largia, quai vuless Enrico Uffer cun la resgia gronda a Tinizong. L'interprendider da lain da Savognin vuless en futur nizzegiar la resursa guaud al lieu ed uschia optimar custs, viadis da transport e porscher ina plivalur al client.

Il consument vul savair d'anunder che ses product vegn.
Autur: Enrico Uffer

Resumescha el il trend ch'el enconuscha sco firma da construcziun cun lain. Ed uschia duess la laina vegnir elavurada al lieu nua ch'ella crescha.

Ils plans per la resgia gronda a Tinizong stattan.
Legenda: Enrico Uffer – Ils plans per la resgia gronda a Tinizong stattan. Tona Poltera

Tuts profiteschan

D'ina resgia gronda, la pli gronda en il chantun Grischun, profiteschan tuts. La vischnanca da Surses per exempel po en futue vender a la resgia l'entir tagl annual e betg sco enfin qua be 8'000 cubics enstagl da 13'000 cubics, quinta Pascal Murbach, il manader da l'Uffizia forestal da Surses.

Pascal Murbach, il manader da l'Uffizi forestal Surses.
Legenda: Pascal Murbach, il manader da l'Uffizi forestal Surses. Tona Poltera

Laina vegn dentant da l'entira regiun Alvra, uschia che er furniturs e firmas forestalas profiteschan.

Enrico Uffer quinta cun investiziuns da 18,5 milliuns francs che investurs privats surpiglian. L'enviern 2023 duess la resgia esser en funcziun.

RTR actualitad 17:00

Artitgels legids il pli savens