Il nov mainafatschenta da l’uniun è Urs Hefti. El surpiglia la gestiun da l’uniun da James Cristallo, che ha fundà e construì il center da cumpetenza. Urs Hefti, specialist da construcziun da lain e cussegliader d’energia, ha experientschas en la construcziun efficienta d’energia e lavura gia in per onns en il center da cumpetenza.
President è vegnì confermà en ses uffizi
Novs partenaris da l’uniun «Ela Energiewelt» èn il Parc Ela e las citads d’energia Alvra e Surses. Il president da l’uniun, il cusseglier dals chantuns Stefan Engler, è vegnì reelegì.
Campus d'energia sin buna via
L’uniun organisescha regularmain infurmaziuns publicas, nua ch’i va per temas d’energia, bajegiar a favur da l’ambient, e da nov era la mobilitad electrica. L'enviern passà ha l’uniun realisà in tancadi per autos electrics. In dals projects actuals che l’uniun promova è il Campus d’energia, in hotel per participantas e participants da curs. Sco quai che Enrico Uffer, il manader da fatschenta da la Uffer SA ha ditg, saja il project sin buna via ed ins quintia da proximamain pudair communitgar dapli.