Il gastronom Ueli Pircher da Lai, il manager d’events Maurin Malär da Lai e l'anteriur veterinari chantunal Kaspar Jörger da Valbella che discurra era rumantsch, vulan daventar president communal.
La vischnanca da Vaz ha publitgà la glista definitiva per las elecziuns dals 29 d’avust. Elegibels èn mo candidatas e candidats ch’èn gia sin la glista.
Per la suprastanza communala datti tants posts sco candidats: Quai èn ils trais novs Beat Fausch da Valbella, Kilian Margreth da Lain e Romano Paterlini da Lai. Thomas Parpan da Lai ch’è gia en suprastanza candidescha danovamain.
Per ils 15 posts en il cussegl communal datti 18 annunzias. Da quellas 18 persunas èn 10 persunas novas.
Probablamian in segund scrutini
Maurin Malär va sco favurit e speranza dals giuvens en l'elecziun, per Kaspar Jörger discurra l'experientscha da vita ed Ueli Pircher vegn a procurar per in segund scrutini. Che Malär è da favurisar mussa il meglier resultat dad el avant trais onns per il cussegl communal e ch'el è bain collià en il turissem da Vaz. Kaspar Jörger po far valair sia experientscha da manar in uffizi chantunal e federal e d'avair l'experienstcha da vita. Ueli Pircher è cleramain il candidat da surpraisa – ma gia avant trais onns ha el vulì far il pass en la suprastanza communala, ha dentant fatg las pli paucas vuschs. El vegn dentant ad engular vuschs a Malär e Jörger, uschia che – probablamain – in segund scrutini decida l'elecziun ils 26 da settember.
