Siglir tar il cuntegn

Grischun Central Emprima badigliada dal hotel «Lai»

Sin il terren da l’anteriura chasa communala da Vaz a Lai vegn construì in hotel cun 90 letgs. Sco quai che l’Agentura da novitads rumantscha ANR scriva, saja l’emprima badigliada stada l’emna passada. L’object che custa radund nov milliuns francs, vegn surdà l’avrigl 2017 al travagl.

Enfin l’onn 2013 sa chattava l’administraziun da la vischnanca da Vaz en il bajetg ch'è da vesair sin la foto
Legenda: Enfin l’onn 2013 sa chattava l’administraziun da la vischnanca da Vaz en il bajetg. mad

Il hotel vegn realisà da la societad acziunara «Lai hotel SA». Il president dal cussegl d’administraziun è Hans Sulser, in um da fatschenta dal chantun Son Gagl. Sco quai ch’el ha ditg envers la ANR, sa drizzia l’hotel surtut a giasts pli giuvens e cun questa nova purschida ins veglia era contribuir insatge per la promoziun dal turissem en la regiun. Il hotel saja bain modern, sapientivamain ins renunzia però a tut il «schnicschnac». Uschia na dettia quai nagin telefon en l’ hotel, nagina minibar en las chombras ed era nagin roomservice.