Siglir tar il cuntegn

Header

video
Emprima badigliada Nordic House Lantsch
Or da Actualitad dals 05.04.2016.
laschar ir. Durada: 2 minutas 24 Secundas.
cuntegn

Grischun Central Emprima badigliada «Nordic House» a Lantsch

L’entschatta è dada. En l’arena da biatlon a Lantsch han cumenzà las lavurs per la nova chasa nordica. Il nov bajetg, construì da l’architect Pablo Horvath da Cuira, vegn a meglierar anc pli fitg l’infrastructura da passlung e biatlon a Lantsch, quai per trenaments sco er per cursas.

audio
Sportissimo: Lantsch daventa il mecca da biatlon en Svizra
ord Sportissimo dals 09.04.2016.
laschar ir. Durada: 5 minutas 17 Secundas.

Sper in restaurant, ina stizun da sport e gardarobas cuntegn la nova chasa nordica tranter auter er in fitness, ina stanza da seminari ed in alloschi per bun 60 persunas. Il nov bajetg da trais auzadas porscha uschia ina infrastructura ideala per uniuns u clubs che vulan passentar e trenar intgins dis a Lantsch.

Cun quella chasa nordica vegn ussa propi realisà il cor da l'entira arena da biatlon. Tut en tut custa il bajetg 9 milliuns francs, daners che vegnan ord ils mauns dal investider e donatur Michael Hartweg, il president dal cussegl d'administraziun da la biatlon arena Lai SA. Sper la promoziun dals giuvens biatlets, vul Hartweg er manar atras a Lantsch cursas da la cuppa mundiala da biatlon.

Grazia al «Nordic House» ademplescha l’entira infrastructura ils criteris da l’Uniun internaziunala da biatlon IBU. Tenor Michael Hartweg vegnan els gia candidà quest onn per cursas da la cuppa mundiala, quai per ils onns 2018 fin il 2022.

audio
Saira: Emprima badigliada per Nordic House a Lantsch
ord Actualitad dals 05.04.2016.
laschar ir. Durada: 3 minutas 23 Secundas.

Il december 2016 duain las lavurs da construcziun esser a fin, uschia che la chasa nordica duai vegnir en funcziun gia la proxima stagiun d'enviern.

RR novitads 17:00 / Sportissimo 09-04-2016

Artitgels legids il pli savens