Sco quai che Harry Graf, il pledader da la EWZ ha ditg sin dumonda, possia l’ovra vegnir manada cun gudogn, quai grazia a daners dal program KEV. La tschiffada d’aua vegn construida sin 1'740 meters sur mar. L’aua deriva dal Adont, in aual lateral da la Gelgia. Turbinada vegn l’aua en ina centrala a Burvagn, da manaivel da Salouf e Cunter. Las lavurs da construcziun cumenzan la primavaira da quest onn e vegnan a cuzzar dus onns. En funcziun duai l’ovra ir la fin dal 2021.
Critica da las organisaziuns da l'ambient
Bain han las organisaziuns da l'ambient acceptà la nova ovra idraulica pitschna grazia in cumpromiss en connex cun l'aua restanta dal lai da Marmorera. Ma sco Anita Mazzetta, la pledadra dal WWF Grischun ha ditg envers RTR, fetschian ovras pitschnas en paglia bler, ed il medem mument produceschian ellas mo pauc electric. Pli prudent fissi tenor Mazzetta d’investir dapli en l’effizienza d’energia, e da cumbinar meglier las ovras idraulicas grondas cun l’energia solara, ch’haja anc in grond potenzial.
RTR actualitad 17:00
