La stad 2020 era gia vegnì construì l'implant solar sin il mir da fermada Albigna en Bregaglia. Ussa han annunzià las ovras electricas da Turitg (EWZ) il proxim project; e quai sin il mir da fermada Lago di Lei. Las lavurs da construcziun cumenzan la stad 2022, scriva l'EWZ.
L'implant solar nov è in zic pli pitschen che quel en Bregaglia e consista da bun 1'000 moduls da fotovoltaica. Cun quels pon ins producir 380 uras megawatt forza electrica mintg'onn. Quai è tant sco 160 chasadas da la citad da Turitg dovran entaifer 1 onn.
Buna producziun en Bregaglia
Sco quai che las ovras EWZ communitgeschan, saja la producziun da l'implant solar Albigna sur las aspectativas – en spezial ils mais d'enviern. Il mars e l'avrigl sajan stads fitg buns. Ils resultats mussian che ovras autalpinas portian in effect positiv en spezial per ils mais d'enviern. L'EWZ evaluescha ussa ulteriurs lieus per tals implants.
