Siglir tar il cuntegn
cuntegn

Grischun Central Era il 2016 pudessi dar cursas da moto a Cazas

En differentas brevs da lecturs vegn reclamà davart la canera da las cursas da Supermoto, ch’han gì lieu la fin d’emna dals 6 e 7 da zercladur. Malgrà l’opposiziun, pudessi l’auter onn dar ina cuntinuaziun da las cursas da Supermoto.

Motociclists a Cazas.
Legenda: Tenor ils organisaturs, han radund 2'000 persunas visità las cursas da Supermoto a Cazas. mad

Sco quai ch’il president communal da Cazas Mario Kollegger ha ditg, vegnia el ensemen cun la suprastanza a decider entaifer ils proxims dus mais, sch’ins veglia lubir era en l’avegnir talas cursas. El haja chapientscha per las differentas reclamaziuns ch’igl haja dà, i saja però era da vesair che las cursas da moto cuzzian mo duas dis. «Sch’igl è insanua ina festa da tir, alura datti canera durant quatter fin tschintg emnas canera, qua tar nus è la canera sa concentrada sin dus dis», uschia il president communal.

Simon Mark, il president dal comité d'organisation da las cursas da Supermoto en il Grischun.
Legenda: Simon Mark, il president dal comité d'organisation da las cursas da Supermoto en il Grischun. RTR, F. Belotti

Repetiziun planisada era il 2016

Il president dal comité d’organisaziun da la cursa da Supermoto spera, ch’e l’auter onn ins possia puspè manar tras ina cursa da töfs a Cazas. Dasperas la lubientscha da la vischnanca da Cazas, dovra quai anc la lubientscha dal chantun. Quel po lubir cursas da töfs enfin 250 cubics. Per vehichels pli gronds èsi en Svizra scumandà, da manar tras cursas da cirquit.