Siglir tar il cuntegn
cuntegn

Grischun Central EWZ ha investì 62 milliuns en renovaziuns

Las Ovras electricas da Turitg EWZ han finì la renovaziun gronda dals davos 3 onns en il Surmeir. Quai scriva la EWZ en ina communicaziun. En tut èn vegnids investids 62 milliuns francs.

Dus lavurants en l'ovra electrica a Tinizong vi d'ina turbina.
Legenda: Era l'ovra idraulica a Tinizong è puspè sin il pli nov stan quai che pertutga la tecnica. RTR, F. Belotti

Ils indrizs da las Ovras electricas a Tinizong e Casti èn vegnids renovads, ed ins haja prendì differentas mesiras d’effizienza vi dal bajetg, sco era remplazzà il stgaudament. Vitiers saja la segirtad da provediment en Surses ed en Val d’Alvra vegnida garantida anc meglier a lunga vista, grazia al nov indriz da transfurmatur. Sanaziuns haia quai era dà vi da differents indrizs al lai da Marmorera, scriva la EWZ plinavant.

Di da las portas avertas

Da nov porscha la EWZ mintgamai il mardi damaun guids tras l’ovra a Tinizong, cun il titel «100% regenerabel : Producziun da current da foza idraulica». La sonda ils 27 da zercladur datti in di da las portas avertas en l’ovra idraulica a Tinizong.