Las immobiglias cun total 11 abitaziuns èn vegnidas construidas ils onns 1964 e 1971 per il persunal da l’ovra electrica a Seglias. Uschia vuleva la EWZ stgaffir spazi d’abitar bunmartgà per las collavuraturas ed ils collavuraturs. Oz vivan mo pli dus collavuraturs da la EWZ en las abitaziuns. Perquai che las chasas ston vegnir sanadas, vul la EWZ sa separar da las immobiglias.
Duas interpresas indigenas vulan cumprar immobiglias
Sin basa d’ina publicaziun propona il cussegl da citad al cussegl communal, da vender las chasas per 1.7 e per 1.9 milliuns francs. Ellas duain vegnir vendidas a duas interpresas artisanalas da la regiun. Quellas vegnan sez a far las renovaziuns. Ina mesadad da las entradas da la vendita duai survegnir la EWZ, l’autra mesadad la cassa da la citad da Turitg.