Siglir tar il cuntegn

Header

audio
Ovra idraulica «Aua da Mulegn»
Or da Actualitad dals 15.11.2022.
laschar ir. Durada: 4 minutas 2 Secundas.
cuntegn

Farera Electricitad per 2'000 chasadas grazia nov'ovra idraulica

La vischnanca da Farera en Val Schons vul construir ina nova ovra idraulica. La radunanza communala da mardi saira ha decidì che l’ovra idraulica «Aua da Mulegn» duai vegnir construida. En tut duessan 13,5 milliuns vegnir investids. L'ovra idraulica duess producir 9 uras gigawatt ad onn.

Il project duai vegnir realisà dal producent d’electricitad Alpiq. Sco quai che Xavier Sinnhuber, il manader da las energias regenrablas ha ditg sin dumonda da RTR, saja ussa il dretg mument da lantschar quest project. Pertutgand las contribuziuns da la confederaziun haja quai dà midadas, l'Alpiq quinta che 50% da las investiziuns da construcziun vegnan subvenziunadas. Sur il contract da concessiun che duess cuzzar 60 onns vegnia l'ovra idraulica a render. La vischnanca vul sa participar cun 30-35%. Fin ussa è gia vegnì investì radund 875'000 francs vi dal project, da quels daners ha la vischnanca pajà 70%, è da leger en il messadi. Il president communal Mischa Gallati ha ditg, che la vischnanca haja adina vulì sviluppar vinavant il project, era sche betg tut saja ì tenor plan fin oz.

Betg in nov project

Farera sa fatschenta gia dapli che 10 onns cun il project. L’onn 2020 èn duas interpresas da Cuira sortids dal project. Cun l’Alpiq haja la vischnanca chattà in partenari cumpetent, è da leger en il messadi. Ils plans prevesan da construir la centrala cun turbina a Farera/Ausserferrera, dasper il Ragn da Farera. Cun tge entradas che la vischnanca po quintar n'è betg anc cler en detagl. Sche tut va tenor plan, duessan las lavurs da construcziun cumenzar la primavaira dal 2024, vi da la rait pudess l'ovra idraulica lura ir l'atun dal 2025.

Novas lingias d'electricitad

Plinavant ha la radunanza communala da Farera approvà in credit da trais milliuns francs. Durant ils proxims sis onns duai vegnir sanada diversa infrastructura, tranter auter duai dar novas lingias d’electricitad.

RTR novitads 15:00

Artitgels legids il pli savens

Scrollar a sanestra Scrollar a dretga