L’enconuschent territori da bouldrar (rampignar senza sua sin in pitschen grip) en il liber Magic Wood a Farrera (Schons al cunfin cun la val d'Avras) ha gronda popularitad e daventa pli e pli fitg l’unfrenda da ses success. 16’000 visitadras e visitaders èn ids l’onn passà en il guaud magic, sco quai ch’il suprastant da Farrera Symen Günther stima. Il problem: Perquai ch’i n’existan betg avunda parcadis, mettan ils rampignaders per part en crusch e travers lur bus ed autos sin la via d’access, uschia che l’auto da posta sco era ils autos na pon betg pli passar. La gronda part dals giasts sa tegna tenor Günther vi da las reglas da parcar vertentas. Tuttina haja la vischnanca stuì clamar la polizia la stagiun passada intginas giadas per runar davent vehichels parcads fauss. Quai rapporta il Schurnal regiunal Grischun da radio SRF.
Emprimas mesiras a partir da quest onn
La vischnanca da Ferrera sa vesa ussa sfurzada da prender mesiras: Vi dals puncts neuralgics vegnan plazzads bists da plantas, uschia che na po betg pli vegnir parcà a l’ur da la via. Uschia ston ils bouldraders e las bouldradras magari parcar pli lontan e vegnir en il Magic Wood cun il traffic public.
Soluziun definitiva fin l’onn 2027
Ch’i dat insumma in tal problem cun ils parcadis, è era d’attribuir a las finanzas da la vischnancas che n’èn betg uschè bunas. Atgnamain aveva il chantun gia dà l’incumbensa a la vischnanca per in concept per ils parcadis. Enfin il 2027 duai ussa dar ina schliaziun definitiva. Il plan: in grond parcadi, plinavant in’applicaziun che mussa sch’i ha anc plazzas libras. La vischnanca da Ferrera tschertga ussa donaturs e donaturas per quest intent. Plinavant emprova la vischnanca da sia vart da generar daners cun taxas da parcar. Gia quest onn pudessan las uras da parcar vegnir installadas.
Or da l'archiv
