Ivo Frei, numnà da tuts «FiFi», ha creà a Farschno in agen mund. En sia chasa da biro, sper sia chasa privata, ha el installà in labor da neuromarketing ed intelligenza artifiziala, sco ch'el numna ses biro. Cun grond plaschair ed anc pli gronda luschezza mussa l'um da 48 onns e pionier d'internet en il Grischun tge avantatgs che il client da sia agentura da marketing ha, sch'el lascha cumbinar datas neurologicas ed intelligenza artifiziala. «Pli spert, pli favuraivel e pli scientific» saja il tool ch'el e ses team han sviluppà ils ultims mais.
La maschina per la lavur – l'uman per la conscienza
L'intelligenza artifiziala saja benedicziun e smaladicziun, uschia Frei. «La maschina lavura 24 uras, 365 dis ed emprenda cun mintga pass», quai saja senza dubi er in aspect economic. Las datas e la software per elavurar quellas custan mintg'onn radund 200'000 francs. Il medem mument haja l'uman dentant er l'incumbensa da l'ultima decisiun, saja quasi la conscienza, raquinta il spezialist da marketing e computer.
Per Ivo «FiFi» Frei è il mument la fiera fitg averta per soluziuns innovativas ed inspirativas. Uschia sajan agenturas da marketing grondas da Turitg il mument er ses clients, i saja dentant er ina dumonda dal temp cura che autras siglian sin il char e cumbineschan datas neurologicas scientificas cun intelligenza artifiziala.