- A partir da glindesdi, ils 5 da matg, vala per Brinzauls la fasa oranscha.
- Danov pon abitantas ed abitants visitar lur chasas e bains mintga di da las 09:00 a las 19:00 – sche la situaziun da segirezza tar la bova lubescha quai.
- Il scumond d'entrar en il vitg per la zona periclitada resta.
- Plans da dischlocar preventiv èn preparads per abitantas ed abitants che vulan – però era per segundindigens.
- Per l'emprima giada communitgescha il stab directiv ch'i saja era da considerar in scumond d'utilisaziun.
L'access al vitg è pussaivel mo sur il punct da controlla Belfort. Sche la situaziun da periclitaziun na permetta betg d'entrar en il vitg, lura vegnan las persunas registradas per la visita infurmadas via SMS la saira avant. Uschia mida la pratica da fin qua, ch'i vegniva tramess SMS, sche l'access al vitg era pussaivel.
L'access per l'agricultura per cultivar il terren na vegn betg midà – ils manaschis purils pon lavurar tranter las 8:00 e las 18:00 sin terren agricul era en la zona dal scumond.
Dapi ils 17 da november 2024 è l'entira populaziun da Brinzauls evacuada. Las autoritads avevan decretà la fasa cotschna per il territori da Brinzauls, perquai che 1,2 milliuns meters cubics crappa smanatschan da glischnar da la spunda engiu e sur il vitg ora. L'emprim da matg han las autoritads proclamà la fasa oranscha.
Dapi lura viva la populaziun en dachasas provisorics ed ha pudì turnar mo sporadicamain e per curt temp en lur chasas.
Ils proxims onns smanatschan anc dapli evacuaziuns
La populaziun sto dentant er durant ils proxims onns quintar cun evacuaziuns. Quai resulta d'ina analisa dad experts consultads. L'uschenumnada «Grava sura» possia en cas da blera plievgia u crudada da grippa adina puspè s'accelerar ed eventualmain sballunar, ha communitgà la vischnanca Alvra.
Drenascha ha bain franà, però betg dapertut
La gallaria da drenascha ch'è en construcziun sut il vitg haja bain in effect, però betg dapertut tuttina. Entant che las bleras zonas glischnian ussa main spert - per part mo anc la mesadad, glischnia il cumpartiment «Plateau» anc adina pli e pli spert.
-
Bild 1 von 3. Grond interess per las infurmaziuns da la vischnanca, co vinavant cun l'abitadi Brinzauls. Bildquelle: RTR.
-
Bild 2 von 3. Las mesiraziuns a lunga vista mussan ch'il moviment è vegnì pli plaun... Bildquelle: RTR.
-
Bild 3 von 3. ... ed ils muments ch'il moviment tschessa, èn savens ils muments ch'i vegn finì drenaschas. Bildquelle: RTR.
Bain possian ins tras la gallaria da drenascha spetgar in effect calmant era sin il «Plateau», però midia quel il mument era sia direcziun. Uschia n'èsi pauc calculabel. Uschia fissi era en l'avegnir adina puspè esser necessari d'evacuar il vitg. Quai pudessia capitar suenter dratgadas pli intensivas, però era suenter bovas pli pitschnas.
Tut en tut saja probabel ch'ins stoppia sur onns ed in decenni quintar cun evacuaziuns da Brinzauls.
In entir vitg tranter return e translocaziun
Tranter speranza e realitad vali adina d'observar las novas infurmaziuns, quant spert che la spunda glischna, e quant aua che vegn probabel giu dal tschiel. Per il mument n'è in return pia betg pussaivel. Per la cuminanza dal vitg èn las visitas a chasa gia avant stadas impurtantas, quellas èn fin uss stadas pussaivlas surtut durant la fin d'emna. Durant il di pon las persunas visitar lur chasas, guardar per curtins ed animals, però era inscuntrar ils vischins en il vitg. Tenor il stab directiv èsi però en vista a futuras evacuaziuns era da ponderar, sch'ins vul viver vinavant a Brinzauls, cun quests custs e surtut cun quest squitsch e l'intschertezza.
Nus avain ina buna schliaziun da cumpensaziun per indigens – ed ina buna per segund-indigens. Sch'ins vul bandunar Brinzauls, sto mintgin decider sez.
Ussa èn elavurads plans pli rigurus per il mender cas. Plans da dischlocaziun, per il cas che Brinzauls na po betg vegnir mantegnì sco abitadi segir, ubain era per persunas che vulan bandunar Brinzauls preventivamain. Quai è scleriments da metter a disposiziun terren a Vazerol, Casti ed Alvagnì per abitantas ed abitants che vulan ir – però era las schliaziuns giuridicas e finanzialas per realisar e cumpensar ina midada.
Uschia resta la populaziun da Brinzauls tranter confidenza e frustraziun, chapientscha e desperaziun. Per ils ins vai memia plaun cun ils plans da construir u pussibilitar acquists cumpensatorics, e per ils auters èsi il pli impurtant che las decisiuns sajan uschè transparentas e gistas sco pussaivel.