Sco quai ch’il president communal da Ferrera ha ditg sin dumonda da RTR, sa retiria el sin la fin da l’onn, oravant tut perquai ch’el na vegnia betg pli da cumbinar sia professiun ensemen cun la lavur en suprastanza. La suprastanta Chiara Caspar che sa retira sin la fin da l’onn ha ditg, ch’ella entschaivia in studi e na possia uschia ord raschuns da temp betg pli star a disposiziun. Viktor Schwarz, ch’è stà plirs onns en suprastanza, è sa retratg gia l’october, quai ord raschuns persunalas e betg politicas. Vinavant en suprastanza restan Christian Brunold ed Adrian Caspar.
Sco quai ch’il president communal Hubert Weibel ha ditg, na dettia il mument anc naginas candidaturas uffizialas per l’elecziun dals trais da december. Interessadas ed interessads possian dentant vegnir elegids da la radunanza communala, era senza candidatura uffiziala. Hubert Weibel è gia dapi 15 onns en uffizi per la vischnanca. Ils onns 2007 – 2012 è el stà en suprastanza, dapi il 2013 presidiescha el Ferrera/Schmitten.