Radund 50 producziuns hai dà ils ultims sis onns en la tur da lain ch’ha in’autezza da radund 30 meters. Perquai che la lubientscha da la tur scada, sto quella vegnir demontada.
Per mai è quai in mument che commova, da preschentar l’ultima giada in program da stad en la tur cotschna. Nus avain malavita che la tur sto svanir, la tur è stada per nus in lieu d’ina ferma identificaziun, ed era in lieu da bleras regurdientschas.
En la tur cotschna datti quest onn in program pulpì. L’entschatta fa il toc «Schöne Nacht» mez zercladur, in’ovra da Brahms, dirigida da Clau Scherrer cun chant da l'ensemble vocal Origen. La derniera è la fin d’avust, quai cun il toc «Grosse Vesper», in’ovra da Rachmaninov, chantà da l'ensemble vocal Origen sut la gestiun da Clau Scherrer. En la tur cotschna datti era in’installaziun da tun da Kirill Richter, sco era diversas preschentaziuns da saut da divers choreografs internaziunals.
Diversas preschentaziuns a Riom
Era a Riom datti questa stad preschentaziuns dad Origen. In gieu en il liber dramatic raquinta dal grond incendi dal vitg dal 1864 e prenda ils aspectaturs cun in grond viadi dal temp che tanscha fin als fieus devastants da l’antica. Ina miniatura da teater per chant, percussiun e clavazin raquinta dal grond incendi. Las chanzuns tradiziunalas gregorianas resunan tranter stgir e cler. Il chastè da Riom daventa in labor da saut experimental e porscha a giuvnas coreografas e giuvens coreografs arrivads spazis libers per creaziuns nunspetgadas, tranter auter Andrey Kaydanovskiy, Dustin Klein, Thiago Bordin, Robert Robinson e Charlie Skuy.
