Siglir tar il cuntegn

Header

cuntegn

Grischun Central «Fieu ed aua» – A Tusaun pon uffants stizzar fieu

Tranter l’avust e l’october da l'onn passà han circa 2’400 scolaras e scolars dal Grischun visità il di tematic che s’occupa cun ils differents privels da fieu ed aua. Gia dapi l’onn 2007 maina l’Assicuranza d’edifizis dal Grischun adina puspè tras questa occurenza.

Dapli che la mesadad da las scolas grischunas da la tschintg- e sisavla classa han visità l'onn 2018 in dals dis tematics. Ils scolars han mintgamai visità quatter posts da lavur.

Post da lavur 1 «Fieu»

Per pudair sa depurtar correctamain en cas d'incendis vegni mussà en il stabiliment d'exercizi cun visitas guidadas captivantas e cun exercizis pratics, co ch'incendis naschan e co ch'els pon vegnir evitads. En il center stat en quest connex: Co impedesch jau incendis?

Post da lavur 2 «Aua»

L'aua po daventar in privel. Nua po ella penetrar en edifizis durant malauras, co pon vegnir alarmads ils pumpiers? En il center stattan en quest connex exercizis pratics sco:

  • dar alarm
  • co protegel jau nossa chasa
  • salvament d'animals

Post da lavur 3 «Pumpiers»

Las scolaras ed ils scolars appartegnan a gruppas da pumpiers che ston d'ina vart salvar sut circumstanzas difficilas in animal serrà en e da l'autra vart stizzar in incendi da cultira. En quest connex emprendan ellas ed els dad agir a moda correcta sut il titel: Mo ensemen essan nus ferms!

Post da lavur 4 «Il torrent Anugl»

Sche auas grondas e glitta sa derschan tras territoris abitads, sco l'onn 2005 a Claustra u l’onn 2017 a Bondo, sche stabiliments ed infrastructuras vegnan destruids, fan mesiras da defensiun spontanas pauc effect. Segirar la vita dals umans e valurs materialas pli grondas ha l'emprima prioritad tar las mesiras immediatas. A las scolaras ed als scolars vegn mussà vi dal torrent Anugl da sa depurtar correctamain en cas d'auas grondas. La conscienza dal privel e dals eveniments pussaivels augmentan la segirezza da las persunas.

RR actualitad 12:00