Fil da Stidier - Il «gigant Surmiran» era 20 meters lung
En il territori sur Filisur, da manaivel dal Corn da Tinizong, èn ils onns 70 vegnidas chattadas costas ed in spundigl d’in saur-pesch. Ussa datti novas scuvertas davart ils gigants ch’èn morts or avant dapli che 200 milliuns onns.
In studi da l’universitad da Bonn e da Turitg è vegnì tar la suandanta conclusiun: Ils fossils ch’èn vegnids chattads l’onn 1976 sin il Fil da Stidier da Heinz Furrer e dus collegas, han gì ina dimensiun gigantica. Tar il chat en il Surmeir sa tracti d’in saur-pesch da radund 20 meters lunghezza cun ina paisa da radund 60 tonnas. Uschia tutga il chat dad in dals pli gronds animals ch’han vivì avant dapli che 200 milliuns onns en il Surmeir.
Studi vegn dapli che quatter decennis suenter il chat
Ch’igl ha cuzzà uschè ditg enfin ch’igl è vegnì fatg in studi, ha la suandanta raschun: Ils davos onns han ins chattà diversas restanzas da gronds saurs nudants en l’America dal nord ed en il Tibet. Perquai saja naschida l’idea dad era puspè analisar las scuvertas dal Grischun, ha ditg Heinz Furrer, il cunautur dal studi. Ils chats dal Grischun, sajan vegnids cumparegliads cun ils chats da l’exteriur. Tenor il studi tutgia il chat dal Fil da Stidier tar la razza dals pli gronds saurs-pesch ch’ins haja chattà en l’entira Europa.
1 / 4
Legenda:
Il geolog pensiunà Heinz Furrer mussa las costas d'in saur-pesch ch'el ha chattà sin il Fil da Stidier l'onn 1976.
RTR, Federico Belotti
2 / 4
Legenda:
Il geolog pensiunà ed anteriur curatur dal museum paleontologic da la ETH Turitg Heinz Furrer dasper il spundigl ch'el ha chattà l'onn 1976.
RTR, Federico Belotti
3 / 4
Legenda:
Quest spundigl è exponì en il museum paleontologic da la scola politecnica da Turitg.
RTR, Federico Belotti
4 / 4
Legenda:
In grond saur-pesch (da maun dretg) tschertga sia preda avant dapli che 205 milliuns onns.
Illustraziun: Jeannette Rüegg/Heinz Furrer
