Sco quai che Markus Schutz, il co-manader da l’orticultura Schutz, ha ditg envers RTR, vendian els adina dapli sorts veglias che sajan ditg svanidas or dal sortiment. In exempel saja la carotta da Filisur che vegniva pli baud vendida enfin en il buffet da la staziun giu Turitg. La glieud veglia oz sa differenziar in pau dal vischin – il trend saja da betg avair il medem sco il vischin en l’iert.
Frajas cun grond gust
Ditg betg pli vendì hajan ins per exempel era la fraja Mieze-Schindler. En tests cun clients gudognia questa fraja adina tar ils clients. Insatgi ch’haja ina giada empruvà questa fraja, veglia adina puspè questa sort, di Markus Schutz. Il dischavantatg saja che questa fraja na sa laschia betg magasinar – ella vegnia spert marscha. Perquai saja ella fitg adattada per l’agen iert, nua ch’ins maglia adina subit la fraja, uschia Schutz.
Raritad dal Tirol dal sid
In’autra sort veglia che saja puspè en vendita saja il giabus da muntogna (Echter Bergkabis). Ch’ins haja quel en il sortiment haja da far cun cletg. Per casualitad ins saja vegnì da savair ch’ina dunna en il Tirol dal sid cultiveschia anc questa raritad. Oz sajan ils sems fitg dumandads, di Markus Schutz.
