Flury vul sentir il puls

Johannes Flury, il nov president da la Lia Rumantscha, vul sentir il puls da la glieud. Perquai vul el visitar uschè bler sco pussaivel il pievel rumantsch. L'emprima visita ha el fatg a Savognin al Café rumantsch.

Johannes Flury (amez) vul sentir il puls da las regiuns, qua en il hotel Danilo a Savognin. Bild in Lightbox öffnen.

Legenda da maletgs: Johannes Flury (amez) vul sentir il puls da las regiuns, qua en il hotel Danilo a Savognin. RTR, F. Belotti

Al Café rumantsch a Savognin ha el tadlà in pau, tge quitads che la glieud ha. Tranter auter han dà da discutar las fusiuns da vischnancas. «La Lia Rumantscha e las uniuns ston far gronda lavur, per ch’i restan propi vischnancas rumantschas», ha ditg Johannes Flury.

«  La Lia Rumantscha e las uniuns ston far gronda lavur, per ch’i restan propi vischnancas rumantschas. »

Johannes Flury
president Lia Rumantscha

En connex cun la fusiun planisada da Filisur e Bravuogn di il president da la Lia Rumantscha: «Ins sto guardar da vegnir en contact cun ils exponents da Filisur per dir ch’els vegnian in pau pli averts, ed a quels da Bravuogn èsi da dir ch’els han da perder insatge, sch’il rumantsch va dal tut a perder, e l’ura èsi da stgaffir ina basa per ch’ins pudess per exempel en la scola mantegnair in zic il rumantsch».

Intervista cun Johannes Flury

4:14 min, Actualitad dals 01.02.2016

Johannes Flury è en uffizi sco president da la Lia Rumantscha dapi l’entschatta da l’onn. El remplazza Duri Bezzola ch’è stà trais onns en uffizi.