Nagina paja il december e naginas prestaziuns socialas - 27 da totalmain 40 miniers han lavurà in mais vi dal tunnel d'Alvra da la Viafier retica senza vegnir indemnisads. Els spetgan anc sin totalmain enfin 700'000 francs. Lur daners n'èn dentant betg dal tut pers - i po esser ch'els retschaivan l'entschatta da matg la paja.
Patruna ha deponì la bilantscha
Il motiv ch'els n'han betg survegnì la paja è, che la patruna taliana, la firma Condotte haja stuì deponer sia bilantscha. Ils daners èn uschia schelads en. Sco proxim decida la dretgira da Roma tgi ch'ha dabun tge.
Arno Russi da l'Unia Cuira e Engiadina è dentant da buna speranza ch'ils lavurers vesan anc lur paja: «La dretgira decida uschia ch'els pajan probalamain l'emprim ils lavurants e pir suenter las bancas.» La buna novitad en il tumult da la firma taliana: Ils lavurants pon er finir las lavurs vi dal tunnel d'Alvra, simplamain sut ina nova patruna. La Viafier retica ha numnadamain surdà las lavurs ad in consorzi e betg sulettamain a la firma taliana.
RR actualitad 17:00