Fundaziun vul salvar stallas en Avras

Stallas e clavads caracteristics per la cuntrada da la val d'Avras duain vegnir spendrads. La fundaziun «Avers Ställe» vul renovar mintg’onn trais clavads. La proxima stad cumenza ella cun in project da pilot.

In clavà ad Avras Podestatenhaus, in ad Avras Cröt ed in terz ad Avras Campsut duain vegnir renovads. Cun quels trais clavads vul la fundaziun rimnar emprimas experientscha, e suenter mintg’onn renovar ulteriurs trais clavads.

Tgenins che quai vegn ad esser, decida la fundaziun ensemen cun ils possessurs interessads. Las renovaziuns duain segirar l’avegnir dals clavads per ina proxima generaziun.

Clavads n'èn vinavant betg abitabels

Tar las midadas na sa tracti dentant betg d’ina midada d’utilisaziun, ma simplamain da salvar las stallas betg abitadas da la decadenza. La fundaziun «Avers Ställe» surpiglia 90% dals custs. Il possessur dal clavà paja 10% u maximalmain 10’000 francs.

Daners sajan avant maun per divers projects a lunga vista. Novs donaturs na vegnian betg tschertgads, ha ditg il deputà dal Cussegl grond e president da la fundaziun Robert Heinz. Al cussegl da fundaziun fan plinavant part il president communal d’Avras Kurt Patzen, l’interprendider Valentin Luzi da Ziràn, il pur Richard Luzi da Podestatenhaus, il pèr da fotografs Bruno e Franziska Mancia-Bodmer da Turitg/Am Bach sco era il deputà dal Cussegl grond Reto Crameri.

RR actualitad 07:20