Persunas che s’avischinan a l’object d’art, pon far in’experientscha nunspetgada e normalmain betg pussibla: L’emprim gira il temp pli plaun e suenter stat el perfin airi.
Chattà lieu ideal
Sch’ins parta da l’ospizi dal Pass dal Güglia èsi da viandar bun in’ura e mez enfin tar la Fuorcla digl Leget (2711 meters sur mar). Sutvart sa chatta in grip marcant, d’ina furma sumeglianta ad ina porta. La decisiun da montar l’ura cun in diameter da dus meters en quest lieu, saja il resultat d’ina lunga tschertga per l’entira Europa enturn. Quai han ditg ils iniziants dal project en ina communicaziun a las medias. L’estetica singulara e l’aspect alpin dal lieu, hajan persvadì ils artists Wolfgang Aichner e Thomas Huber. Il chantun Grischun ha lubì d’exponer l’ura per dus mais. Uschè spert ch’ils viandants e las viandantas vegnan damanaivel da l‘ura, sa retarda la lantschetta da las secundas. Sch’insatgi sa posiziunescha gist davant l’ura, lura stat quella airi.
Tecnica raffinada
Che l’ura reagescha sin moviments è pussaivel grazia ad ina camera cun sensur. Quella definescha la distanza ed adattescha la spertezza da las lantschettas da l’ura. Uschè spert ch’ina persuna s’allontanescha da l’ura, s’accelereschan sias lantschettas. Ina giada che tut las persunas èn puspè avunda lunsch davent da l’ura, piglia quella suenter il temp manchentà enfin ch’ella cuntanscha puspè il temp real. Ina cella da carburant procura per l’electricitad per la sensorica e per il pitschen computer integrà. L’ura che resta exponida enfin ils 24 da settember, vegn installada en collavuraziun cun las autoritads dal chantun Grischun e las vischnancas da Surses e Tumleastga.
La natira vegn respectada
Las singulas parts da l’ura èn vegnidas transportadas si a pe e cun chavals. La cuntrada duess vegnir protegida e laschada enavos sco quai ch’ella è vegnida chattada. Ils artists èn sezs alpinists cun bun’experientscha, han gia organisà divers projects d’art en cuntradas sensiblas. Oriundamain èsi stà planisà da far l’installaziun gia sin ils 30 da fanadur. Perquai ch’in crivel (Turmfalke) era vi dal cuar è il project vegnì spustà.