Siglir tar il cuntegn

Fuorcla digl Leget Il temp stat airi

A la Fuorcla digl Leget damanaivel dal Pass dal Güglia batta il bratsch d’ina ura surdimensiunada. Ils dus artists da Minca Wolfgang Aichner e Thomas Huber han gì l’idea per l’installaziun speziala. La grondezza n'è però betg il sulet spezial vi da l’ura.

Persunas che s’avischinan a l’object d’art, pon far in’experientscha nunspetgada e normalmain betg pussibla: L’emprim gira il temp pli plaun e suenter stat el perfin airi.

Chattà lieu ideal

Sch’ins parta da l’ospizi dal Pass dal Güglia èsi da viandar bun in’ura e mez enfin tar la Fuorcla digl Leget (2711 meters sur mar). Sutvart sa chatta in grip marcant, d’ina furma sumeglianta ad ina porta. La decisiun da montar l’ura cun in diameter da dus meters en quest lieu, saja il resultat d’ina lunga tschertga per l’entira Europa enturn. Quai han ditg ils iniziants dal project en ina communicaziun a las medias. L’estetica singulara e l’aspect alpin dal lieu, hajan persvadì ils artists Wolfgang Aichner e Thomas Huber. Il chantun Grischun ha lubì d’exponer l’ura per dus mais. Uschè spert ch’ils viandants e las viandantas vegnan damanaivel da l‘ura, sa retarda la lantschetta da las secundas. Sch’insatgi sa posiziunescha gist davant l’ura, lura stat quella airi.

Tecnica raffinada

Che l’ura reagescha sin moviments è pussaivel grazia ad ina camera cun sensur. Quella definescha la distanza ed adattescha la spertezza da las lantschettas da l’ura. Uschè spert ch’ina persuna s’allontanescha da l’ura, s’accelereschan sias lantschettas. Ina giada che tut las persunas èn puspè avunda lunsch davent da l’ura, piglia quella suenter il temp manchentà enfin ch’ella cuntanscha puspè il temp real. Ina cella da carburant procura per l’electricitad per la sensorica e per il pitschen computer integrà. L’ura che resta exponida enfin ils 24 da settember, vegn installada en collavuraziun cun las autoritads dal chantun Grischun e las vischnancas da Surses e Tumleastga.

La natira vegn respectada

Las singulas parts da l’ura èn vegnidas transportadas si a pe e cun chavals. La cuntrada duess vegnir protegida e laschada enavos sco quai ch’ella è vegnida chattada. Ils artists èn sezs alpinists cun bun’experientscha, han gia organisà divers projects d’art en cuntradas sensiblas. Oriundamain èsi stà planisà da far l’installaziun gia sin ils 30 da fanadur. Perquai ch’in crivel (Turmfalke) era vi dal cuar è il project vegnì spustà.

Artists activs per il mund enturn

Avrir la box Serrar la box

Gia dapi il 2005 collavureschan ils dus artists Wolfgang Aichner e Thomas Huber. En il collectiv d’art numnà «global aesthetic genetics» han ils dus umens da Minca gia realisà differents projects spezials. Il 2011 han els per exempel purtà sin las spatlas ina bartga da 150 kilos tras las Alps, enfin ch’els èn arrivads a la 54avla Biennala a Venezia. L’onn 2013 han els lura organisà in «powerwalk» e purtà rodas da vent sin il pli grond glatscher da l’Europa, il Vatnajökull en l’Islanda. Ed era il 2017 han els fatg surstar, cura ch’els han tratg cun in culli purtà sin il dies, cunfins imaginars tranter differents stadis dals Stadis Unids.

Bildergalerie

RTR actualitad 11:00

Artitgels legids il pli savens