Siglir tar il cuntegn

Grischun Central Fusiun da la Val Schons danovamain in tema

A la radunanza communala d’Andeer da mesemna saira ha la suprastanza communala preschentà ils avantatgs ed ils disavantatgs d’ina fusiun da vallada. Plans da fusiun concrets na datti però anc nagins.

L'administraziun communala da Andeer.
Legenda: L'administraziun communala da Andeer. RTR, F. Belotti

Tenor il president communal d’Andeer Hans Andrea Fontana, hajan 45 persunas visità la radunanza communala. Da las quatter remartgas da preschents hajan duas persunas s’exprimì a favur da la fusiun, e duas persunas encunter la fusiun.

Fontana vesa differents avantatgs en la fusiun. Ina gia haja ina vischnanca gronda da 1’900 persunas in’influenza pli gronda tar il chantun ch’ina vischnanca pitschna. Impurtant saja però che tut las vischnancas sa participeschian vid ina fusiun, quai cun la vischnanca da Farrera e surtut era Runtgaglia/Rongellen.

Il president communal crai ch’i vegnia anc ad ir intgins onns enfin ch’i possia puspè vegnir votà davart ina fusiun. La davosa votaziun da fusiun en Val Schons ha fatg naufragi l’onn 2010, quai pervi d’in na da Ziràn-Reschen.