Per la segunda giada ha l'Uniun da commerzi e mastergnanza Surses organisà l'exposiziun da mastergns, quai en collavuraziun cun la scola superiura da Surses.
L'exposiziun da professiuns actuala è ina collavuraziun cun l'Uffizi da furmaziun professiunala, las regiuns Viamala ed Alvra e las uniuns da commerzi e mastergnanza localas.
Ina buna plattafurma
L'exposiziun da mastergns a Savognin saja ina buna plattafurma per las firmas indigenas per mussar tge emprendissadis ch'èn pussaivels da far en la val u en la regiun, ha ditg Pirmin Cotti, il responsabel da l'Uniun da commerzi per la scolaziun.
Las firmas hajan la schanza da sa preschentar e da vegnir directamain en contact cun las persunas giuvnas.
Pliras branschas e plirs mastergns
Sa preschentads èn 25 manaschis da Surses ed er fatschentas da l'exteriur che èn commembras da l'Uniun da commerzi e mastergnanza Surses. Preschentads èn vegnids 38 differents mastergns.