Senza discussiun ha la radunanza communala approvà la dumonda da la Runals Beiva SA da surpigliar ina garanzia da 150'000 francs en connex cun l’amplificaziun dal neivadoir enfin Camon. Questa garanzia è necessaria per che la societad survegn dal chantun Grischun in credit d’investiziun NPR (Nova politica regiunala) ed in import correspundent à fonds perdu da radund 25'000 francs. Ils custs totals per l’amplificaziun dal neivadoir enfin Camon muntan a 0.5 milliuns francs. Il credit da 150'000 francs ha la Runals Beiva SA da pajar enavos sur ina durada da diesch onns al chantun, scriva la vischnanca da Surses en ina communicaziun.
Approvaziun da duas leschas
La radunanza communala ha approvà senza discussiun e cun gronda maioritad la lescha davart il menaschi da la rait da distribuziun e la furniziun d’energia da l’ovra electrica Surses (leschad’electricitad). La lescha è applicabla per la rait da distribuziun da l’ovra electrica Surses, che cumpiglia tut las vischnancas fusiunadas da Surses cun excepziun da Beiva. Per Beiva valan las disposiziuns dal provediment d’energia da Beiva, ils «Impianti elettrici Bivio». La lescha entra en vigur ils 1. da schaner 2017. Er la lescha da pumpiers da Surses è vegnida approvada senza cuntervusch. Cun la resalva da l’approvaziun entras la segiranza da bajetgs Grischun va la lescha da pumpiers en vigour retroactivamain sin ils 1. da schaner 2016.
Crusch empè da festa da fusiun
Sut la tractanda varia ha la vischnanca da Surses infurmà, ch’i vegnia organisada nagina festa da fusiun. Per sa regurdar a la fusiun ch’è succedida sin l’entschatta da quest onn, vegnia installada ina crusch sin il Piz Calderas, il pli aut punct en vischnanca Surses sin 3’397 meters sur mar. L’inauguraziun da la crusch è planisada ils otg d’october. La crusch vegn sgulada direct davent da la festa da tundida sin il Piz Calderas, nua ch’ina pitschna gruppa cun giasts vegn a festivar la ceremonia.
RR novitads 23:00