Grev accident a Rothenbrunnen/Giuvaulta – 1 mort, 1 grev blessà

  • Gievgia, 1.12.2016, 15:03, actualisà a las 18:45

Al portal dal sid dal tunnel da l’Isla Bella sin l'autostrada A13 hai dà gievgia curt suenter las 14:00 ina collisiun frontala d'in auto e d'in camiun. Il manischunz da l’auto privat è mort al lieu d’accident, scriva la Polizia chantunala. Il manischunz dal camiun è grevamain blessà.

In detagl da la vart sut dal camiun. Bild in Lightbox öffnen.

Legenda da maletgs: In detagl da la vart sut dal camiun. RTR, Telesguard

  • En il sid dal tunnel da l’Isla Bella hai dà ina collisiun frontala tranter in auto privat ed in camiun.
  • Tenor la polizia è il camiun silsuenter collidà cun la saiv da segirezza da vart dretga, lura ì sin il vial oppost da la via, rut tras la saiv da segirezza sanestra e crudà sur la scarpa.
  • Il manischunz dal camiun grevamain blessà è vegnì transportà cun la Rega a Cuira en l’Ospital chantunal. Il manischunz da l’auto privat è mort al lieu da l’accident.

Via serrada per bunamain tschintg uras

En acziun èn stads il salvament da vias da Cuira, ils pumpiers da Tusaun, duas ambulanzas, la Rega e la Polizia chantunala.

L'autostrada A13 tranter Rothenbrunnen/Giuvaulta e Rehanau è stada serrada en omaduas direcziuns tranter curt suenter las 14:00 e curt avant las 19:00. Il traffic è vegnì svià sur la via chantunala.

RR novitads 15:00++ / Telesguard 17:40