Siglir tar il cuntegn

Header

video
Pass dal Spleia: Italia vul laschar avert sur onn
Or da Telesguard dals 07.03.2023.
laschar ir. Durada: 3 minutas 48 Secundas.
cuntegn

Grischun betg d'accord Italia vul laschar avert il pass dal Spleia l'entir onn

Il minister d’economia talian Giancarlo Giorgetti vuless, ch’il pass dal Spleia resti avert durant l'entir onn. Il mument è quel serrà l’enviern. Tranter auter passa ina pista da skis sin la via dal Pass dal Spleia.

Il favrer è Giorgetti s’inscuntrà a Chiavenna cun represchentants da la politica regiunala, per discurrer sur da las sfidas futuras. Tranter auter ha el menziunà, ch’il pass dal Spleia duess esser avert durant l’entir onn. El haja gia tematisà quai cun la politica grischuna, ha el ditg envers Tele Sondrio News.

audio
Pass dal Spleia: Italia vul laschar avert sur tut onn
ord Actualitad dals 07.03.2023. Maletg: Keystone
laschar ir. Durada: 2 minutas 47 Secundas.

Il Grischun n’è dentant insumma betg intgantà da quest’idea:

Nus n’avain betg la finamira da far l'avertura da quella via. Quella via fa durant l'enviern part dal territori da skis da Spleia, e nus n’avain nagin’alternativa persuenter. E perquai avrir la via dal pass muntass er in privel economic per il territori da skis, ma sa chapescha era per l'economia da l'entira regiun che dependa fitg dal turissem d’enviern.
Autur: Carmelia Maissen Departament d'infrastructura, energia e mobilitad

Il territori da skis da Spleia n’è betg in grond tema en l’Italia. Persuenter vegn argumentà cun il Pass dal Lucmagn. Quel saja cumparabel cun il Pass dal Spleia. Era quel saja avert tut l’onn.

Per il cusseglier dals chantuns Martin Schmid, na saja quai dentant betg il medem. Là hajan ins mo stuì far pitschnas midadas per laschar avert il pass tut l’onn, ha el ditg envers RTR. Al pass dal Spleia saja la situaziun in'autra. Ins stuessi construir in tunnel, per pudair laschar avert il pass tut l’onn. Quai sajan fitg grondas investiziuns ch’in stuessi far, plinavant duvrass quai gallarias. «E quai na ves jau betg», ha ditg Schmid ch’è creschì si a Spleia.

Italia vul insister sin in'avertura dal pass

Questa stad vegn festivà il giubileum da 200 onns da la via commerziala da Cuira a Chiavenna/Bellinzona. Sco quai ch’il minister talian ha annunzià, veglia el allura danovamain tematisar sia pretensiun envers il Grischun.

Or da l'archiv

video
Utopias enturn il pass dal Spleia
Or da Cuntrasts dals 08.09.2019.
laschar ir. Durada: 25 minutas 24 Secundas.

RTR actualitad 17:00

Artitgels legids il pli savens