Thomas Cadosch ch’è oriund dad Alvaschagn, ha gia organisà bleras festas ad Alvaschagn. Perquai che las festas da famiglia èn adina grondas, affitta el savens la sala da gimnastica da la scola ch’è serrada. Fin ussa era quai adina pussaivel da durmir en ils salvs da la protecziun civila, ha Cadosch ditg sin dumonda da RTR. Quai na saja ussa betg pli pussaivel, la vischnanca haja dentant offrì da durmir en la chasa da gruppas a Mon. Quai saja dentant memia lunsch davent ha ditg Cadosch.
RTR ha confruntà la vischnanca cun la problematica. Daniel Albertin, il president communal ha ditg, ch’ins vegnia a surlavurar il reglament ed ins veglia ussa puspè lubir da durmir en salvs da la vischnanca. En ils tschalers da la protecziun civila na saja quai dentant era en l’avegnir betg pussaivel ord raschuns da segirtad.
RTR actualitad 11:00