Actualmain è la dumonda per in binari dubel tar l’Uffizi federal da traffic, ch’examinescha la dumonda. L’exposiziun publica è scadida ils 14 da mars. Yvonne Dünser, la pledadra da la Viafier retica ha confermà, ch’i haja dà quatter recurs, che vegnian ussa tractads.
La Viafier retica quinta, da pudair cumenzar cun las lavurs da construcziun la primavaira da l’auter onn. Tranter Tusaun e Seglias exista gia oz in binari dubel, almain sin ina part dal traject. Da nov ston vegnir construids radund 800 meters. Cura ch’il binari dubel è construì tranter Tusaun e Seglias, probabel la fin dal 2019, mesira il traject cun binari dubel 2.3 kilometers.
Adattaziuns duai dar era tar la staziun da Seglias, ils custs totals dal project muntan a 25 milliuns francs. Tenor la Viafier retica pussibilitescha il binari dubel nov ina pli auta stabilitad da l’urari.