Ils 18 da november ha in alpinist chattà a Lantsch tranter Bova Pintga e Bova Gronda las restanzas terrestras d'ina persuna sparida. Sco quai che la Polizia chantunala communitgescha sa tractia d'in um ch'era sparì dapi 5 onns. L'um da lura 70 onns aveva bandunà ils 22 d'avust 2013 sia chasa da vacanzas per ir a viandar. Suenter ch'el n'era betg returnà, era la polizia vegnida infurmada. Las acziuns da tschertga n'han quella giada però betg gì success.
