-
Bild 1 von 4. Quest inserat è cumparì en la Pagina da Surmeir. Bildquelle: RTR, Federico Belotti.
-
Bild 2 von 4. Il president communal da la vischnanca Albula/Alvra acceptass l'elecziun en il cussegl grond, malgrà ch'el n'è gnanc candidat uffizial. Bildquelle: RTR, Federico Belotti.
-
Bild 3 von 4. Reto Crameri da Surava vegniss gugent reelegì en il Cussegl grond. Bildquelle: RTR, Federico Belotti.
-
Bild 4 von 4. Il pur da Casti Roman Collenberg appartegna al comitè da sustegn «anavant cun Daniel Albertin». Bildquelle: RTR, Federico Belotti.
Sco quai che Daniel Albertin ch’è dapi otg onns en il Cussegl grond ha ditg envers RTR, acceptass el la veglia dal pievel, sch’el vegniss elegì. Da quest inserat che cumpara en la Pagina da Surmeir ed en las Novitads, haja el gì enconuschientscha. Cun quai ch’el n’è dentant betg candidat uffizial, na crai el era betg d’avair grondas schanzas da vegnir elegì.
Pertge na candidescha el betg?
Tut va enavos sin ina empermischun che Albertin ha fatg avant trais onns: Avess il circul Alvaschein suenter la fusiun da la vischnanca Albula/Alvra vinavant dad avair il dretg sin mo dus sezs en il Cussegl grond, alura na vegnia el betg a candidar danovamain, aveva Albertin ditg da lez temp envers ses collega da partida Reto Crameri da Surava, da lez temp anc circul Belfort.
Perquai che Surava è suenter la fusiun vegnì en il circul Alvaschein, datti uss ensemen cun Romano Paterlini ed Albertin tuttenina trais empè da dus deputads dal cussegl grond, che pudessan candidar per dus sezs. Albertin ha tegnì en sia empermischun ed ha decidì da betg daventar candidat uffizial per la Partida cristiandemocratica, a lezza ch’appartegnan era Paterlini e Crameri. Uschia èn ussa mo els dus candidats uffizials per il Cussegl grond.