Il nov salv per giuvenils a Cunter pudess vegnir realisà il favrer da l'onn proxim. Avant na saja quai betg pussaivel perquai che las localitads vegnan anc duvradas da l’armada Svizra durant il Forum mundial d’economia WEF.
Post da giuvenils d'Alvagni sustegna il post a Cunter
Manà vegn il post da giuvenils da Thomas Eigensatz da Salouf ch’ha gia experientscha cun lavurar cun giuvenils entras il sport. La plazza è dotada cun 40%, e vegn organisada dal post da giuvenils Nido del Lupo d’Alvagni.
Sco quai ch’il manader Fabio Botta ha ditg envers RTR, saja pussaivla era ina collavuraziun cun Casti, tge che fetschia franc pli interessanta la lavur da la manadra ed il manader da la lavur da giuvenils.
-
Bild 1 von 3. Nido del Lupo d'Alvagni (foto) è responsabel per la lavur da giuvenils a Cunter. Bildquelle: RTR, Federico Belotti.
-
Bild 2 von 3. Fabio Botta, il manader da la chasa Nido del Lupo. Bildquelle: RTR, Federico Belotti.
-
Bild 3 von 3. En il tschaler da protecziun civila a Cunter duai il nov lieu d'inscunter per giuvenils vegnir installà. Bildquelle: RTR, Federico Belotti.
In lieu ideal – betg lunsch davent da Savognin
Per Giancarlo Torriani, il suprastant da la vischnanca Surses, saja il lieu a Cunter ideal. Sura sa chattia ina plazza da giugar a ballape e cun quai che las localitads da la protecziun civila sajan gia pli baud ina giada vegnidas duvradas da giuvenils, saja avant maun ina tscherta infrastructura.
Cun quai che las localitads èn en possess da la vischnanca da Surses, na stoppian‘ins era pajar nagins tschains. A Savognin ins haja era guardà, ma chattà nagut che haja persvadì, uschia Torriani.
RR actualitad 12:20