Resgia da Tinizong-Rona fa frunt a la concurrenza bunmartgada
-
Bild 1 von 2. La resgia da Tinizong-Rona. Bildquelle: RTR, F. Belotti.
-
Bild 2 von 2. Peter Janutin, il schef da la rezgia da Tinizong-Rona. Bildquelle: RTR, F. Belotti.
En il Grischun han ils davos onns serrà differentas resgias communalas. En il Surses per exempel è vegnida serrada avant 2 onns e mez la resgia da Savognin – tranter auter pervi da la gronda concurrenza sin il martgà da laina ed investiziuns en novas maschinas che n’avessan betg rendì.
La davosa resgia en il Surses è quella da la vischnanca Tinizong-Rona. Cun novas ideas emprova la resgia da far frunt a la concurrenza cun pretschs bas. Sco quai che Peter Janutin, il manader da la resgia ha ditg, saja la resgia spezialisada sin giavischs spezials dals clients: Tut vegnia fatg tenor giavisch individual, per exempel bancs pli simpels, saivs individualas e laina che po vegnir duvrada per la construcziun d’instruments. Plinavant furnescha la resgia da Tinizong-Rona tut las zinslas per arder per il spital e la chasa d’attempads, sco era la scola cirquitala da Savognin e per differents privats.
Tinizong/Rona - la suletta resgia en Surses
La scrinaria da l’Argo a Surava porscha bler
-
Bild 1 von 4. La scrinaria nova è vegnida inaugurada l'onn 2011. Bildquelle: RTR, F. Belotti.
-
Bild 2 von 4. Robert Poltera ha fatg sia scolaziun en la scrinaria a Surava. Bildquelle: RTR, F. Belotti.
-
Bild 3 von 4. Fabian Demarmels da Salouf viva a Surava e lavura dapi 5 onns en la scrinaria da Surava. Bildquelle: RTR, F. Belotti.
-
Bild 4 von 4. Dapi dus onns maina Claudio Elsa la scrinaria a Surava. Bildquelle: RTR, F. Belotti.
La fundaziun grischun Argo poscha lavur a 500 persunas creschidas cun in impediment. En la scrinaria da Surava lavuran en media 6 fin 9 persunas. Actualmain fabritgescha la scrinaria per ils apiculturs chistas per avieuls. Tenor il manader da la scrinaria Claudio Elsa haja la scrinaria blers clients da la regiun che stiman la valur da la laina Grischuna. Cun la buna qualitad ins possia far frunt als products bunmartgads da l’exteriur.
A Surava vegnan producids differents products da laina sco tramagls, rauba per la cuschina u chistas per cloccas da vin e bler auter. Tar serias pli grondas fabritgescha la scrinaria tut tenor las pussaivladads era tenor giavisch dal client. L’onn 2011 è la scrinaria vegnida construida da nov per 2.35 milliuns francs, da quels ha il chantun surpiglia 950’000 francs, 1,5 milliuns ha pajà la Argo.
La scrinaria da l'Argo a Surava
Mobiglia certificada cun il label dal Parc Natiral Beverin
-
Bild 1 von 2. La sedia Safier Träumer. Bildquelle: mad.
-
Bild 2 von 2. La Randulina, la mobiglia modulara. Bildquelle: mad.
La scrinaria TM da Ziràn ha elavurà ina mobiglia modulara, che po vegnir cumbinada l’ina cun l’autra. Il sistem ha num «randulina». La laina deriva dal Parc Beverin. Ed ina scrinaria da Tenna ha elavurà il «Safier Träumer», ina sedia cumadaivla che porscha plaz per 1 u 2 persunas. Quels products vegnan vendids cun il label dal Parc Beverin.
Scrinaria a Latsch producescha laina per instruments
-
Bild 1 von 2. Andrea Florinett en sia ses deposit per laina per instruments a Latsch/Bravuogn. Bildquelle: RTR, F. Belotti.
-
Bild 2 von 2. La lagna po setgentar meglier sch'ella vegn pendida si en il plafun. Bildquelle: RTR, F. Belotti.
Cun grond success exporteschan ils dus frars da la Val d’Alvra Andrea e Rico Florinett laina per producir instruments. La laina vegn exportada en passa 40 pajais. Il curs aut dal franc Svizzer s’accorscha la firma Tonewood SA da Latsch/Bravuogn betg grond. Cun quai ch’ina gronda part dals exports va en ils Stadis Unids da l’America, nua ch’il curs da valuta è sa revegnì, marschan ils affars vinavant bain. Quai ha ditg Andrea Florinett.
Era il pretsch per laina radunda ch’è sa sbassà n’haja nagina influenza sin ils affars: Affars cun laina per instruments sajan ina nischa – ed ils pretschs sajan restads stabils, ha Andra Florinett ditg plinavant.
La laina per instruments dals frars Florinett
Firma da Cunter restaurescha chasas veglias
-
Bild 1 von 3. Fredy Von Büren restaurescha chasas veglias dapi 15 onns. Bildquelle: RTR, F. Belotti.
-
Bild 2 von 3. La laina è documentada bain. Bildquelle: RTR, F. Belotti.
-
Bild 3 von 3. Ina part da la laina veglia è en il liber, in'autra part vegn magasinada davains. Bildquelle: RTR, F. Belotti.
La firma Von Büren da Cunter restaurescha en l’entir chantun chasas veglias. A Cunter datti in fitg grond magasin cun blera laina veglia, e plirs tschients portas cun tut ils scharniers necessaris. La gronda lavur vegn fatga en l'Engiadina. La firma ha però era renovà la clavadeira da Sontga Crousch a Riom, dal festival cultural Origen.
Il restauratur da Cunter, Fredy Von Büren
Actualitad la bunura 06:00