L’investiziun saja necessaria perquai ch’i dettia adina dapli envierns memia chauds, che na garanteschian betg in glatsch durant l’entira stagiun d’enviern, scriva la vischnanca. Cun la realisaziun da la nova plazza da glatsch artifizial, na vegn la vischnanca da Vaz en l’avegnir a pajar nagut pli vi da la preparaziun da la plazza da glatsch natiral d’in hotel a Valbella. Suenter l'emprima stagiun d'enviern che la nova plazza da glatsch artifizial è stada en funcziun, elavurescha ina cumissiun, in concept general per il futur dal glatsch a Lai.
Posta po manar vinavant bus da sport
Plinavant ha il cussegl communal da Vaz decidì, da prolungar a partir dal schaner 2016 il contract cun la Posta Svizra SA, che maina il bus da sport a Lai, quai durant la stad e l’enviern. Il nov contract duai puspè valair per tschintg onns. La fatschenta sto anc vegnir confermada dal suveran a l’urna.
Quint cuntentaivel per la vischnanca
Il quint dal 2014 da Vaz è vegnì approvà dal cussegl communal senza grondas discussiuns. El serra cun in surpli dal retgav da 9.4 milliuns francs, quai tar investiziuns nettas da 7.9 milliuns francs. Quest quint saja fitg cuntentaivel, ha ditg il chanzlist Johann Gruber sin dumonda da RTR.