La substanza dal hotel «Löwe» a Mulegns dovra lavurs urgentas, per ch’il bajetg po vegnir spendrà. Uschia ha infurmà la Nova Fundaziun Origen en las localitads da l'hotel a Mulegns. Cunzunt lavurs vi dal tetg ston vegnir fatgas, per impedir ch'aua possia vegnir en. Era duai l’entir inventari e l’architectura interna vegnir documentada.
Fin la fin da l'onn 2020 vul Origen nizzegiar intensiv il hotel per exposiziuns e per occurrenzas culturalas. Suenter la renovaziun duai il bajetg lura era puspè servir sco hotel. La finanziaziun da l’entir project n’è dentant anc betg garantida, ha ditg Giovanni Netzer d’Origen.
Lavur da persvasiun è necessaria
La Nova Fundaziun Origen spera uss da pudair persvader partenaris politics, fundaziuns pli grondas ma era privats d'investir en il mantegniment da l’hotel «Löwe». L'hotel è vegnì construì l’onn 1872 en connex cun l'impurtanta lingia da charrotschas da posta tranter Cuira e l‘Engiadin’Ota.
L'hotel è vegnì construì durant il temp da piunier dal turissem en il Grischun ed è uschia ina perditga autentica da quest temp. Perquai ha l'hotel era ina muntada per la Tgira da monuments chantunala. Las lavurs da renovaziun ed il stan actual da l'hotel duain vegnir documentads.
L'hotel «Löwe» ha adina puspè fatschentà
RR actualitad 17:00
