Las vacanzas da stad han cumenzà. Ils scolars e las scolaras han bandunà lur stanzas da scola e giaudan per gronda part giuador lur temp liber.Mo tge resta enavos? Con blers fastizs dals scolars restan en la chasa bandunada? E cunzunt: Tgi schubregia alura quai che resta enavos?
En la chasa da scola dal stgalim superiur a Savognin – nua che radund 100 uffants van a scola – è il pedel Markus Margreth responsabel che la chasa da scola daventa puspè schubra. Durant 3 emnas ha el da schubregiar - ensemen cun ina gidantra - la chasa da trais auzadas.
Tge è il mender da nettegiar?
Fastizs resistents dals uffants, sco per exempel schlogns sut il pult, stritgs da fieuters u sdrimas da chalzers sin ils palantschieus sajan betg u uschè in grond problem en la chasa da scola secundara a Savognin, di Markus Margreth. E uschiglio dettia en sasez per mintga merda in med da far davent.