En il rom da la nova strategia «Pumpiers 2015» è – ultra d'auters temas – er vegnida lantschada la reorganisaziun da la dustanza d'ieli e da chemia dal Grischun. En quest connex duain ils standards da prestaziun temporals vegnir adattads a las normas svizras e la dustanza actuala d'ieli e da chemia duai vegnir extendida al servetsch ABC dal Grischun.
Per quest intent han ins reducì il dumber da basas da 16 a 10 e fatg differentas adattaziuns persunalas e materialas. Oz èn vegnids surdads ils emprims trais vehichels ABC a la basa da la Ems-Chemie (basa principala) sco er a la basa da Tavau. Sis ulteriurs vehichels vegnan surdads ils proxims onns a las autras basas.
Basa da la Ems-Chemie
Ensemen cun ils pumpiers da manaschi da la Ems-Chemie maina l'Assicuranza d'edifizis dal Grischun (GVG) la basa principala ABC per il chantun Grischun. Dapi onns saja quai in partenadi ideal, scriva la GVG. Tuttas duas partidas possian profitar da questa collavuraziun. Ultra da pumpiers da manaschi cumpetents metta la Ems-Chemie er a disposiziun quatter da set spezialists da chemia per manar las basas da la GVG.
Basa da Tavau
Il vehichel per Tavau serva sco emprova da pilot per la nova flotta da vehichels. Sch'il vehichel è adattà, lura vegnan las set basas restantas medemamain equipadas ils proxims onns cun tals vehichels.
Tavau posseda plinavant in vehichel da sustegn dals pumpiers – er numnà roboter da stizzar fieu – che vegn duvrà cunzunt per stabiliments da traffic sut terra (garaschas sutterranas, tunnels e.u.v.). La GVG è sa participada cun 40% a la cumpra da quest vehichel. Tut tenor il success vegn decidì da cumprar in fin dus tals vehichels per il chantun.
Finanziaziun
La finanziaziun dal servetsch ABC GR stat sin trais pitgas:
- 1/3 uffizi federal da vias/confederaziun
- 1/3 uffizi per la natira e l'ambient (chantun GR)
- 1/3 GVG
Ils novs vehichels ch’èn vegnids preschentads custan ca. 1,2 milliuns francs. La Ems-Chemie SA è sa participada cun ca. 1/3 a la cumpra da l'auto-cisterna grond.
-
Bild 1 von 6. Markus Feltscher, il directur da l'Assicuranza d'edifizis dal Grischun preschenta ils novs vehichels. Bildquelle: RTR, F. Belotti.
-
Bild 2 von 6. Quest nov vehichel da la Ems Chemie duai era gidar a stizzar fieus ordaifer Domat sch'i fa da basegn. Bildquelle: RTR, F. Belotti.
-
Bild 3 von 6. Sch'il camiun sa cumprova, duain era las autras basas dal Grischun survegnir in tal vehichel. Bildquelle: RTR, F. Belotti.
-
Bild 4 von 6. In dals dus novs vehichels dals pumpiers da la Ems Chemie. Bildquelle: RTR, F. Belotti.
-
Bild 5 von 6. Ils pumpiers da Tavau èn il mument ils sulets pumpiers dal Grischun ch'han in roboter per stizzar fieus. Bildquelle: RTR, F. Belotti.
-
Bild 6 von 6. Pumpiers da la Ems Chemie en lur monturas spezialas per cas chemics. Bildquelle: RTR, F. Belotti.
RR actualitad 06:00