Siglir tar il cuntegn

Grischun Central Gronda agitaziun en la plaiv Alvra

Pervi da la l'inquietezza en la plaiv Alvra han ina suprastanta ed in suprastant inoltrà lur demissiun. In pretenda schizunt la demissiun in corpore da l’entira suprastanza ch’ha tschintg commembers. Trais vulan però restar en uffizi.

Baselgia catolica dad Alvagni.
Legenda: Tgi fa ad Alvagni messa en l'avegnir? La pastoraziun en Val d'Alvra n'è betg anc reglada definitivamain. RTR, Federico Belotti

Il problem da la dispita è la dumonda tgi che duai far la pastoraziun en Val d’Alvra. La suprastanta ed il suprastant ch’han inoltrà la disditga van d’accord cun la decisiun da l’uvestgieu da Cuira, ch’ha reglà da nov la pastoraziun, e quai na vulan ils trais auters en suprastanza betg acceptar. L’uvestgieu da Cuira vul engaschar il vicari Philipp Isenegger ch’è il mument anc a Savognin, sco administratur per las plaivs da la Val d’Alvra sura che cumpiglia Alvagni, Schmitten, Surava, Bravuogn e Filisur.

Ils «vegls» duessan era esser ils «novs»

Il president da la vischnanca da plaiv Alvra Werner Wind e dus cun-suprastantas avessan il pli gugent trais paders da l’ulteriura uniun Quell des Lebens che fan messa. L’uniun Quell des Lebens aveva l’incumbensa da s’engaschar per la pastoraziun en Val d’Alvra. Perquai che la collavuraziun na funcziunava betg sco giavischà, ha l’uvestgieu da Cuira laschà schliar l’uniun Quell des Lebens. Tenor in fegl sgulant da l’uvestgieu da Cuira hajan ils trais paders menziunads gia chattà ina nova incumbensa en auters lieus, uschia ch’i na saja gnanc pussaivel ch’els restian en Val d’Alvra.

RR actualitad 12:00