Enfin ussa stueva il club da hockey dals Ela Eagles trenar en la halla a Lai ed er ils pli giuvens stuevan far quel viadi. Cun il nov center da sport La Nars e cun il glatsch artifizial ha sa midà tut. Roland Kolb, in dals iniziants avant dudesch onns per in club da hockey ed er in dals promoturs per il center da sport, traglischa cura ch'el raquinta dal glatsch artifizial. «Nus purschin ussa ina scola da hockey e per il club è quai d'enorma impurtanza» resumescha l'amatur da hockey. Alexander Cadotsch, il responsabel per la scola da hockey, è stà surprais dal grond interess: «Quintà avain nus cun 10, uss èn 26 uffants tranter quatter ed otg onns che traneschan mintgamai il glindesdi».
Il glatsch ha midà tut
Per Roland Kolb ed Alexander Cadotsch è il glatsch artifizial a La Nars sco in da sis en il lotto. Pudair porscher in glatsch artifizial, quai en in talmain bel ed unic lieu, saja in siemi. Cun la scola da hockey saja quai er la basa per l'existenza dal club e quai ch'els observan er – ils adversari da gieus da plausch giogan pli gugent or en il liber enstagl en ina halla. Unicamain insatge na saja betg anc ideal: «I mancan las garderobas ed il nov restaurant». Quel project ha la vischnanca da Surses gì da surluvrar e spustar cunquai ch'in credit suplementar è vegnì refusà dal suveran l'onn passà.
