Sco ch'il possessur dal hotel Cube Rudolf Tucek ha ditg envers RTR, lavuria el il mument vi da la reavertura dal hotel. Sche pussaivel duai quai capitar anc quest enviern. Sche quai gartegia propi, dependia dentant da las cundiziuns da basa. Ins saja vi da diversas preparativas, ed i na dependia betg mo dad el. Dapli na possia el betg dir per il mument, ha aschuntà Tucek. En l'internet èn gia vegnidas publitgadas offertas da plazzas per lavurar en il Hotel Cube, quai cun cumenzament a partir dad immediat.
Gia cler è che l’affar da sport ch’è stà serrà dapi pli ch’in onn, duai puspè avrir. Sin ina affischa vi da la porta d’entrada stà scrit, che la butia da sport avra gia ils 26 da december. Tenor Tucek na saja quest termin però betg anc definitiv.
Vischnanca na sa da nagut
Tar la vischnanca da Surses na san ils responsabels nagut d’ina reavertura dal Cube planisada. Sco quai ch'il president communal da Surses Leo Thomann ha ditg, n’hajan els gì nagin contact cun il possessur austriac dal hotel Cube. Uschia na possian els era dir nagut en chaussa. La vischnanca beneventia dentant cleramain, sch’il hotel pudess puspè avrir.
RTR novitads 17:00
