Sco quai ch'il president dal cussegl d'administraziun ed acziunari principal dal Cube Rudolf Tucek communitgescha, avra l'hotel ils 9 da schaner 2020 puspè sias portas. Cun ina decisiun da la dretgira chantunala, nua ch'igl è ì per ina dispita da dretg cun las pendicularas da Savognin, saja stgaffì la basa per la reavertura. L'hotel vegnia per il mument manà sco hotel-garni, pia sco hotel che porscha ensolver e bavrondas. Avant Nadal aveva Rudolf Tucek confermà envers RTR ch'ins tschertgia puspè persunal e che la stizun da sport dal Cube avria ils 26 da december 2019.
Betg resguardà contract dal 2005
En la sentenzia da la Dretgira chantunala dal Grischun vegn tranter auter pretendì che las pendicularas da Savognin stoppian ademplir in contract da l’onn 2005. En quel stettia scrit che las pendicularas mettian a disposiziun l'hotel Cube ina maschina per stampar cartas d'ir cun skis. Sulet uschia saja tenor Tucek pussaivel da porscher als giasts in pachet cumplet. Las Pendicularas da Savognin èn dentant sa retratgas il 2018 da quest contract dal 2005. Quai pervi da differenzas che pertutgavan l'indemnisaziun per las cartas dad ir cun skis.
Tenor la sentenzia da la Dretgira chantunala dal Grischun avessan las Pendicularas però betg pudì annullar il contract dal 2005. Las Pendicularas din sin dumonda da RTR ch’ins n’haja anc betg vesì la sentenzia. Uschia na possian ins il mument anc betg prender posiziun. Fatg è che las pendicularas han anc peda enfin ils 3 da favrer da trair enavant la sentenzia davant il Tribunal federal.
RTR novitads 17:00
