Siglir tar il cuntegn

Header

Navigaziun

cuntegn

Grischun Central I va era senza l'hotel Cube

L'hotel Cube a Savognin è serrà dapi il settember da l’onn passà. Enstagl da 490 ha Savognin mo pli 220 letgs d'hotel. Da la serrada datti er intgins che profitan.

Affars sco il Bananas (da la vart sanestra) han dapli clients perquai ch'il hotel Cube è serrà.
Legenda: Affars sco il Bananas (da la vart sanestra) han dapli clients perquai che l'hotel Cube è serrà. RTR, Federico Belotti

Stefan Moser, il manader da l’affar da sport Bananas a Savognin, ha ditg, ch’el haja gì tant da far sco daditg betg pli. Uschia haja el dà a tschains tantas scarsolas sco anc mai, tge che saja cler ina consequenza da la serrada dal Cube.

Marschà fitg bain èn era ils affars en il Café Olivia ed en la bar Palaver al stradun da Savognin. La manadra Olivia Argenti ha ditg ch’ella haja gì tant da far sco adina sur ils dis da festa – la serrada dal Cube na saja strusch da sentir.

En l'hotel Danilo-Pianta a Savognin s’accorschan ins in pau ch’il Cube è serrà. Uschia hajan ins gì intginas famiglias che sajan pli baud stads en il Cube. Il mument hajan ins era radund 250 pernottaziuns supplementaras da gruppas, che durmivan pli baud en il Cube, di Clarita Klee-Pianta, la directura da l'hotel.

Per la directura da Savognin Bivio Alvra Turissem, Tanja Amacher, saja da sentir la mancanza da l'hotel Cube, surtut durant inscunters cun bleras gruppas – uschia stoppian ins uss collavurar dapli cun auters hotels da la regiun, perquai che las capacitads da Savognin na tanschian betg.

RR actualitad 07:00