Siglir tar il cuntegn

Header

video
Schlet clima da lavur en Center da sanadad Savognin
Or da Telesguard dals 11.10.2018.
laschar ir. Durada: 3 minutas 58 Secundas.
cuntegn

Grischun Central «Igl è vegnì crititgà senza differenziar»

Quatter brevs da lecturs en la Südostschweiz crititgeschan la direcziun da l'ospital a Savognin. In anteriur medi conferma quellas impressiuns. Il directur Gion Cola refusa dentant quellas renfatschas.

La critica en las brevs da lecturs van surtut encunter la direcziun dal center da sanadad Savognin. En quellas vegn renfatschà a la direcziun che lezza «schicanescha [ils medis], fin ch'els inoltreschan lur desditga».

In medi raquinta

Stefan Langenegger ha lavurà il 2015 per in mez onn sco medi assistent e sco medi superiur. El ha cumenzà a lavurar gist suenter ch'il schefmedi Rudolf Horn ha survegnì la desditga. Atgnamain era planisà da star almain in onn. Suenter in mez onn ha el – en consentiment vicendaivel cun la direcziun – smess da lavurar.

audio
Mezdi: Center da Sanadad Savognin – Reproschas enturn il management
ord Actualitad dals 11.10.2018.
laschar ir. Durada: 2 minutas 19 Secundas.

Atgnamain haja el gì in bun temp si Savognin, raquinta el. Però in pèr puncts disturbavan fitg. Dad ina vart mancava tenor el ina «cultura da soluziuns». Tar sbagls vegniva surtut crititgà e betg tschertgà la raschun dal problem.

Igl è vegnì crititgà, senza ch'ins ha guardà pli exact daco ch'in sbagl è insumma capità.
Autur: Stefan Langenegger Anteriur medi superiur
Stefan Langenegger.
Legenda: Stefan Langenegger. RTR

Vinavant stuevan ils medis assistents cumbatter fitg per survegnir il temp per sa perfecziunar. Medis assistents han dabun quatter uras l'emna per exempel per leger e discutar studis u per sa perfecziunar ad autra moda. Tenor Langenegger n'han els però strusch survegnì quel temp. Il motiv saja stà la mancanza da resursas.

Directur na vegn betg concret

Gion Cola prenda mo posiziun en scrit. Tenor el funcziunia la collavuraziun tranter medis e direcziun fitg bain. Ina giada l'emna sclereschian els durant ina sesida da direcziun tut las fatschentas operativas. Da la direcziun fetschian part er ils dus schefmedis. Sin las renfatschas concretas da Stefan Langenegger na possia el betg prender posiziun, perquai ch'el sa tegna vi d'ina cunvegna en scrit.

La collavuraziun cun ils medis e fitg buna. Quai pertutga era la collavuraziun en la direcziun.
Autur: Gion Cola Directur dal Center da Sanadad Savognin

Durant la damaun dals 11.10 ha la direcziun dal Center da Sanadad tramess ad RTR las retschertgas da persunal dals medis assistents. En quellas sa ves'ins che la cuntentientscha era dal 2014 fitg bassa. A partir da la mesadad da l'onn 2015 fin l'onn 2017, cur ch'era Stefan Langenegger lavurava en l'ospital, sa han ils resuns dentant meglierà.

Betg en ina simpla situaziun

Ils ultims set onns han 5 medis en il cader da Savognin dà giu lur plazza. Dus medis l'onn 2017, in l'onn 2018. La fluctuaziun tar ils assistents saja anc pli gronda scriva il directur Gion Cola.

Vinavant cumbatta l'ospital Savognin cun las finanzas. Il cussegl d'administraziun ha decis il zercladur ensemen cun la direcziun mesiras da spargn. Tranter auter era tar il pensum dals medis. Era il dumber da pazients va enavos. Tenor il rapport da l'onn 2017 ha il center da sanadad bunamain in quart pli paucs pazients staziunars e var 10% pli paucs cas ambulants.

RR actualitad 06:00+

Artitgels legids il pli savens