Siglir tar il cuntegn

Header

video
Ils problems al Center da sanadad a Savognin eran enconuschents
Or da Telesguard dals 12.10.2018.
laschar ir. Durada: 2 minutas 52 Secundas.
cuntegn

Grischun Central Il cussegl d'administraziun enconuscheva ils problems

Il cussegl d'administraziun dal Center da Sanadad Savognin saveva da tscherts problems tar ils medis. Il Center da Sanadad Savognin è vegnì en la critica pervia da cundiziuns da lavur manglusas. In anteriur medi ha discurrì envers RTR da schicanas ed ha crititgà la direcziun.

Ier ha il medi Stefan Langenegger raquintà ad RTR davart problems ch'i deva en l'ospital durant il temp ch'el ha lavurà a Savognin il 2015. El ha discurri davart medis che vegnivan schicanads, la cultura da crititgar manglusa u era ch'ils medis stuevan cumbatter per la scolaziun obligatorica ch'els avevan dabun.

Al cussegl d'administraziun èsi enconuschent ch'i ha dà tscherts problems tar ils medis en il Center da Sanadad Savognin. Il president Clemens Poltera accentuescha dentant che la situaziun tar ils medis saja uss buna.

audio
Bunura: Center da Sanadad Savognin – Cussegl d'administraziun enconuscha problems
ord Actualitad dals 12.10.2018.
laschar ir. Durada: 2 minutas 1 Secunda.

Betg mo problems tar ils medis

Problems n'haja dentant betg mo dà tar ils medis, conceda Poltera. Anc quest onn haja dà problems en il laboratori u era en la chasa d'attempads. En omaduas partiziuns hajan emploiads bandunà il center da sanadad.

Pervia da la critica hai dà midadas tar la direcziun. Uschia fa Christine Demarmels dapi bun in mais part da la direcziun. Sper esser responsabla per la contabilitad è ella era responsabla en cas da problems tar il persunal, declera Clemens Poltera. Christine Demarmels saja ina persuna cun experientscha che haja era ina buna collavuraziun cun ils emploiads. Il cussegl d'administraziun spera ch'i vegnia tras la nova mesira puspè pli ruassaivel en il Center da Sanadad Savognin.

audio
Saira: Center da sanadad a Savognin – Uss hai num crear fidanza, manegia la vischnanca
ord Actualitad dals 12.10.2018.
laschar ir. Durada: 2 minutas 4 Secundas.

Vischnanca ha persequità ils problems

Il president da Surses Leo Thomann sesa sco represchentant da las vischnancas sez en il cussegl d'administraziun dal center da sanadad. El conceda ch'ils davos onns cun tut questa critica haja chaschunà quitads.

Las mesiras ch'èn vegnidas instradadas sajan stadas bunas. I saja dentant impurtant ch'i vegnia vinavant lavurà vi dals problems, di Thomann. I saja impurtant che la populaziun survegnia puspè enavos la fidanza en il center da sanadad a Savognin.

RR actualitad 07:00

Artitgels legids il pli savens