Sco quai che Pia Plaz, la coordinatura da la «Revista digl noss Sulom» ha ditg, scrivian radund 10 persunas per l’ediziun che cumpara il december. Il tema principal da la revista n’ha ella betg tradì, quai duai esser ina surpraisa ha ella ditg. Las rubricas dal nov Sulom èn: Famiglia, cuschinar, litteratura, fotografias che cumpareglian l’ier ed oz, e purtrets. Sche necessari datti anc la rubrica necrolog.
Ord motivs finanzials na datti betg pli il Sulom tradiziunal che cumpareva ina giada ad onn cun in cuntegn da fin 200 paginas. Plinavant hai dà ina sminuziun dals lecturs. Grazia la midada sin ina revista saja quai pussaivel da spargnar custs, ed uschia betg far mintg’onn in deficit da fin 10’000 francs, ha ditg Zegna Pittet-Dosch, la presidenta da l’Uniun Rumantscha Grischun Central, l’editura da la «Revista digl noss Sulom». Cun la nova revista spera ella plinavant da pudair acquirir dapli abunents.
