Siglir tar il cuntegn

Header

cuntegn

Grischun Central Il pli grond center da sport da chavaltgar da la Svizra orientala

Metter sut in tetg tut quai che chavals, lur possessurs ed amaturs giavischan. Quai vulan ils iniziants dal center da sport da chavaltgar sin las Planoiras a Parpan.

La stad 2018 scada il contract da la famiglia Spinas sin il bain a Tavau. Cunquai che la dumonda da far curs, camps e vacanzas cun chavals crescha, las pussaivladads da crescher a Tavau n'èn betg dadas, è l'idea da far insatge cumplettamain nov naschida.

audio
Mezdi: Plans per in grond center da chavaltgar a Parpan/Planoiras
ord Actualitad dals 18.03.2016.
laschar ir. Durada: 4 minutas 45 Secundas.

Ina pulita dimensiun

50 boxas per chavals, 15 chavals per lecziuns da dressura, siglir, chavaltgar western, voltischar, e quai per scolar uffants e giuvenils, e lura anc ina tratga da chavals cun 3 fin 5 chavals da raz. Ed anc ina halla da chavaltgar da 30 sin 60 meters plus tribuna, quai è la dimensiun ch'i dovra per pudair realisar concurrenzas pli grondas. Pensiun da chavals cun tractaments da fisio. Program da wellness per ils chavals cun bindel da currer en l'aua per tractaments da fisio. Quai è be ina part da tut quai ch’il project vul porscher sut in tetg. Betg d'emblidar las excursiuns sin chaval en la regiun Planoiras.

La via a la realisaziun è magari ambiziusa

Il nov center da sport da chavaltgar duai nascher sin ina parcella dal chantun. I sa tracta da terren da fundaziun dal Plantahof. Il runal da Proschieri sa chatta era en quella regiun. L'idea è da trair a niz inqual sinergia sco access u parcadi. Il terren nua ch'ins vul bajegiar è sin territori da la vischnanca da Vaz. Lezza spetga il concept surlavurà dals iniziants per pudair inoltrar quel al chantun per ina preexaminaziun.

Bleras dumondas da planisaziun

Il project dovra ina revisiun parziala da la planisaziun locala, ina per ina zona da bajegiar normala u ina che lubescha da construir ordaifer la zona. En pli è da sclerir la dumonda da la zona speziala per sport da chavaltgar. Tut questas dumondas èn anc avertas.

L'entira planisaziun d'utilisaziun, la midada da zonas, las lubientschas da bajegiar èn pretensiusas e dovran lur temp. Supplementarmain fa era da basegn il consentiment dals da Vaz, e per la via access e las rutas per chavaltgadas sin lur terren dals da Churwalden.

Ensaina da dumonda: finanzas e termins

In ulteriur punct central è la finanziaziun. Ils iniziants quintan cun investiziuns da radund 10 milliuns francs. La mesadad vulan els rabitschar ensemen via investiders e sponsurs. In investider grond manca dentant anc.

Fin la fin da la stad 2016 vulan ils iniziants avair segirà l'entira finanziaziun. La stad 2017 vulan els lura cumenzar a bajegiar. La stad 2018 fiss previsa l’avertura dal pli grond center da sport da chavaltgar da la Svizra orientala.

Artitgels legids il pli savens