Sco tar autras occurrenzas han era ils Dis dal film mundial a Tusaun pers ils davos onns in u l’auter sponsur. Uschia survegnivan els il 2010 anc 27’000 francs da la Confederaziun. E davent da quest onn mancan era ils daners da la Migros.
Sponsur sto ir a prà
Agid vegn da l’uniun da promoturs ch’ils Dis dal film mundial han, sco Ueli Soom dal comité d’organisaziun ha ditg ad RTR. Quell’uniun rimna daners tar fundaziuns a moda professiunala. Mintga sponsur n’è dentant tuttina betg bainvegnì a Tusaun, sco Soom ha agiuntà. Uschia na vulan ils organisaturs naginas bancas sco sponsur, per els saja quai la dumonda da restar autentic.
Sguard davos las lingias grossas
Tenor ils organisaturs dals Dis dal film mundial po il public guardar quest onn davos las lingias grossas da sensaziuns actualas. Uschia survegnia quel ina invista pli vasta e differenziada en munds esters, lontana da tut clischés. Per exempel sa spievla la guerra sgarschaivla en Siria en in plazzal d’in sgrattatschiel a Beirut, nua che fugitivs sirians lavuran, entant che lur patria vegn destruida da bumbas. Ina documentaziun sur da balenas daventa in retschertga engaschada sur da la polluziun da plastic en l’ocean. U il film sur d’ina dunna in Serbia, che chatta il crim da guerra da ses um cun rumir l’abitaziun.
Era films con lioms svizzers
Ed era la Svizra è represchentada cun films, che ristgan il sguard davos las sensaziuns: per exempel ha il reschissur da teater Milo Rau arranschà in tribunal fictiv sur da la guerra civila en Congo ed ha creà in film documentar captivant ordlonder. Ed Irene Loebell accumpogna en ses film ina giuvna gruppa da saut plain speranza en in anteriur township en Africa dal Sid, che vul fugir cun saut contemporan da miseria e povertad. En tut datti da vesair a Tusaun 40 films da 4 continents durant ils Dis da film mundial.
Cuschina adattada als films
Era quest onn datti ina ustaria aposta per ils dis da film en l’hotel Weiss Kreuz, che cuschina spaisas dals pajais dals films en il program. E per l’emprima giada datti ina disco per sautar tar suns da l’entir mund atras las notgs da la fin d’emna.
Ils 27avels Dis da film mundial Tusaun duran dals 31 d’october enfin ils 5 da november.
RR actualitad 17:00