Hans Kaspar Schwarzenbach, il manader da Mustér-Sedrun Turissem deplorescha che sia regiun na fa betg part a la Grand Tour of Switzerland. Però: «Jau met da princip en dumonda, sch’igl è insumma raschunaivel che l’organisaziun naziunala Svizra Turissem recumonda ina tala ruta, perquai che cun ina recumandaziun ins di il medem temp, che las autras purschidas na sajan betg da recumandar», uschia il manader da Mustér-Sedrun Turissem.
Era Roland Huber, il manader da Surselva turissem è trumpà che la ruta na passa betg tras sia regiun: «Per l’ina deplorain nus, da betg far part a la ruta, perquai che cun la Ruinaulta avain nus in object enconuschent da reclama, però pudain nus era chapir che betg tut las regiuns pon vegnir resguardadas».
Era ad Arosa èn‘ins betg cuntent: «La Grand Tour of Switzerland è ina buna idea, quai è franc insatge ch’è dumandà tar il giast, e qua fissan nus gugent era stads preschents», ha ditg Pascal Jenny, il directur da cura d’Arosa. In’intervenziun tar Svizra Turissem e si’uniun purtadra n’haja dentant purtà nagut.
«Far dretg a tuts na va betg»
Per Martin Nydegger da Svizra Turissem èsi cler ch’ins na possa betg far dretg a tuts. A l’entschatta hajan’ins sa fatschentà cun la dumonda, tge ch’il success da la Grand Tour feschia ora. Suenter ins haja cumpareglià cun autras rutas sco la Route 66 (Stadis Unids da l’America) u la Garden Route (Africa dal Sid). La conclusiun: «Tuts han ditg ch’ins na possia betg resguardar la situaziun politica cun resguardar tut ils chantuns u tut las vischnancas da la Svizra, ed uschia avain nus stuì ir en cumpromiss», ha ditg l’expert da la direcziun da Svizra Turissem.
